Kahit sa malalaking siyudad, ang banta ng karahasan at mga “election-related offenses” ay dumarami. Sa National Capital Region (NCR), naitala ang pinakamataas na bilang ng mga naarestong lumabag sa election gun ban ngayong Halalan 2025. Ayon sa Philippine National Police (PNP) noong Mayo 9, umabot sa 1,007 ang mga nahuling lumabag sa gun ban sa Metro Manila pa lamang. Sa kabuuan, nasa 2,923 ang bilang ng mga naaresto sa buong bansa, kabilang ang mga sibilyan, security personnel, halal na opisyal, at ilang miyembro ng rebeldeng grupo.
Isa sa mga pinakamatunog na kaso ng karahasang politikal ay ang pagpaslang kay Leninsky Bacud, nominee ng Ang Bumbero ng Pilipinas party-list, noong Abril 28, 2025 sa Barangay 435, Sampaloc, Maynila. Ayon sa ulat ng pulisya, si Bacud ay binaril ng mga hindi pa nakikilalang salarin habang nasa labas ng isang gusali sa P. Guevarra Street. Isinugod siya sa ospital ngunit idineklarang dead on arrival. Nakaligtas naman ang mga kasama niya. Patuloy ang imbestigasyon at wala pang naitalang aresto kaugnay ng insidente.
Hindi rin ligtas ang ibang siyudad sa tumitinding tensyon ng halalan. Sa Cebu City, naitala ang presensya ng mga armadong grupo sa ilang barangay, dahilan upang paigtingin ang mga checkpoint at presensya ng pulisya. Sa Zamboanga City at Cagayan de Oro, may ulat ng harassment sa mga campaign volunteers at tangkang pananambang sa ilang lokal na kandidato.
Ayon sa PNP, higit sa 2,870 armas at mahigit 10,000 piraso ng bala ang nakumpiska sa buong bansa mula nang ipatupad ang election gun ban noong Enero 12, 2025. Kabilang dito ang 2,589 small firearms, gaya ng mga baril na may maliit na kalibre tulad ng .22, .38, o 9mm na madaling itago. Nakumpiska rin ang 112 replicas (mga huwad na baril), 70 explosives, 58 light weapons tulad ng submachine guns at short-barreled shotguns, at 32 airsoft guns na maaaring gamitin sa panlilinlang o intimidasyon.
Kasama sa mga nahuli ay 2,795 sibilyan, mga ordinaryong mamamayan na nahuli dahil sa paglabag sa gun ban. Kadalasan, ang mga nahuling sibilyan ay may ilegal na armas o nagdala ng baril sa mga lugar kung saan ito ay ipinagbabawal. Kasama rin sa mga nahuli ang 48 security guards, 19 miyembro ng PNP, 18 sundalo, at 6 miyembro ng CAFGU. Ang CAFGU (Citizen Armed Force Geographical Unit) ay isang paramilitary group na binubuo ng mga sibilyan na tumutulong sa mga militar at pulisya sa kanilang mga operasyon.
