Nagsimula nang maramdaman ang epekto ng krisis sa gitna ng Estados Unidos at Israel laban sa Iran sa pandaigdigang merkado ng langis at sa mga bansang umaasa sa imported na enerhiya gaya ng Pilipinas.
Dito sa ating bansa, ang direktang epekto ng mga airstrikes at missile attacks ay ang pagtaas ng presyo ng langis, ang posibleng dagdag gastusin sa repatriation ng mga Pilipino sa rehiyon, at ang epekto sa kita ng mga Overseas Filipino Workers. Sa kasalukuyan, ito ay naging pangunahing alalahanin ng pamahalaan.
Nagbabala na maaaring magkaroon ng malaking pagtaas sa presyo ng petrolyo sa susunod na mga linggo habang tumataas naman ang presyo ng langis sa pandaigdigang merkado. Maaaring tumaas ang presyo ng diesel ng hanggang ₱23 kada litro at ang gasolina ng hanggang ₱13 kada litro kung magpapatuloy ang pagtaas ng presyo ng langis dulot ng tensyon sa Middle East.
Ang pagtaas ng presyo ay may kaugnayan sa pangamba sa Strait of Hormuz, isang mahalagang ruta ng pandaigdigang kalakalan ng langis kung saan dumadaan ang humigit-kumulang 20% ng suplay ng langis sa mundo. Ang anumang pagkaantala sa rutang ito ay maaaring magdulot ng agarang pagtaas ng presyo ng petrolyo sa pandaigdigang merkado.
Bilang tugon, nagsimula na ang pamahalaan na magpatupad ng mga hakbang upang bawasan ang konsumo ng enerhiya. Inatasan ang mga ahensya ng gobyerno na bawasan ng 10% hanggang 20% ang paggamit ng kuryente at gasolina. Inihayag din ang pansamantalang apat na araw na on-site work week sa ilang tanggapan ng gobyerno upang mabawasan ang biyahe ng mga empleyado at ang paggamit ng gasolina. Hindi saklaw ng patakarang ito ang mga ahensyang nagbibigay ng mahahalagang serbisyo at mga frontline agencies.
Pinag-aaralan din ng pamahalaan ang iba pang hakbang kung patuloy na tataas ang presyo ng petrolyo, kabilang ang posibleng suspensyon ng excise tax sa fuel, subsidiya sa transport sector, at libreng sakay para sa mga commuter.
Bukod sa presyo ng langis, maaaring lumaki rin ang gastusin ng pamahalaan kung lalawak ang repatriation ng mga Pilipino mula sa Middle East. Mahigit 1,400 Pilipino na ang humiling ng tulong sa pag-uwi mula sa rehiyon habang patuloy ang kaguluhan.
Malaki rin ang nakataya sa ekonomiya ng bansa. Tinatayang $6 bilyon hanggang $8 bilyon ng taunang remittances ng mga OFWs ay nanggagaling sa Middle East, isang mahalagang bahagi ng kita ng maraming pamilyang Pilipino.
Bagama’t malabo ang direktang banta ng militar sa Pilipinas, ang tunay na panganib ng krisis ay maaaring maramdaman sa mas mataas na presyo ng langis, dagdag na gastusin ng gobyerno, at posibleng epekto sa kabuhayan ng milyun-milyong Pilipinong nagtatrabaho sa rehiyon.
