Nakakabahala ang pagtaas ng kaso ng suicide sa Pilipinas, kabilang ang ilang insidenteng kinasasangkutan ng mga estudyante.
Mula sa pagkamatay ng isang mag-aaral sa isang istasyon ng tren sa Metro Manila, hanggang sa isang insidente na iniimbestigahan sa Bacolod City na kinasangkutan ng isang 17-anyos, malinaw na may mga kabataang nasa loob ng sistema ng edukasyon ang apektado sa lumalalim na krisis sa kalusugang pangkaisipan.
Ayon sa Philippine Statistics Authority, umabot sa 3,379 ang namatay sa pamamagitan ng intentional self-harm noong 2024. Mas mataas ito ng 246 kumpara noong 2023, at katumbas ng halos siyam na kaso kada araw.
Sa unang anim na buwan ng 2025, halos 2,000 na kaso na ang naitala ng Philippine National Police, o humigit-kumulang 11 kada araw. Bagama’t hindi lahat ay estudyante, ang pagtaas ng pambansang bilang ay nagbibigay-diin sa pangangailangang tutukan ang kalagayan ng mga kabataang nasa paaralan.
Related article: The Urgent Mental Health Crisis in the Philippines
Sa hanay ng mga mag-aaral, may mga ulat noong 2025 ng pagkamatay ng isang law student sa Cavite at isang graduating health sciences student sa Maynila na iniugnay sa matinding personal at akademikong presyur. Pinatitibay ito ng isang 2025 school-based adolescent mental health study sa Cavite kung saan 54% ng mga kabataang edad 13 hanggang 16 ang nakaranas ng suicidal ideation, 24.2% ang nagtangkang magpakamatay, at 34.2% ang nag-ulat ng self-harm behaviors.
Para sa maraming estudyante, ang presyur sa edukasyon ay nagmumula sa mataas na expectations, kompetisyon sa akademiko, at takot sa pagkabigo. Gayunpaman, nananatiling limitado ang mental health support sa maraming paaralan. Sa ilang institusyon, iisa lamang ang guidance counselor para sa libo-libong mag-aaral, at hindi lahat ay may regular na psychological screening o agarang access sa counseling services.
Dagdag pa rito ang stigma na pumipigil sa mga estudyante na magsalita o humingi ng tulong. Ang takot sa paghusga, paglalagay ng label, o pag-aakalang “mahina” ay nagiging hadlang sa maagang interbensyon at paghingi ng tulong.
