Lalong lumalakas ang panawagan para kay Senate President Francis “Chiz” Escudero na kumilos—o bumaba sa puwesto—matapos lumipas ang inaabangang Hunyo 2 na pagsisimula ng impeachment trial laban kay Pangalawang Pangulo Sara Duterte nang walang pagdinig.
Nagsimula ang proseso ng impeachment kay Duterte nang ihain ng House of Representatives ang verified complaint noong Pebrero 5, 2025. Nilagdaan ito ng 215 mambabatas, lampas sa one-third requirement ng Konstitusyon. Ito ang unang pagkakataon na naharap sa impeachment ang isang nakaupong bise presidente ng Pilipinas.
Binubuo ang reklamo ng pitong artikulo na inaakusahang nilabag ni Duterte ang Konstitusyon, nagtaksil sa tiwala ng publiko, sangkot sa katiwalian, at iba pang mabibigat na krimen. Kabilang sa pinakamabigat na paratang ang publiko niyang pag-amin sa plano umanong saktan sina Pangulong Ferdinand Marcos Jr., Unang Ginang Liza Araneta-Marcos, at House Speaker Martin Romualdez—isang akto na binanggit bilang paglabag sa Konstitusyon at pagtataksil sa tiwala ng bayan. Kasama rin sa mga kaso ang maling paggamit ng ₱612.5 milyon na confidential funds ng Office of the Vice President at Department of Education, panunuhol sa anyo ng cash gifts sa mga empleyado ng DepEd, at hindi maipaliwanag na yaman na kaugnay sa iregularidad sa kanyang Statement of Assets, Liabilities, and Net Worth. Tinukoy rin sa reklamo ang umano’y papel ni Duterte sa extrajudicial killings sa Davao, tangkang pagpapabagsak sa pamahalaan, at isang artikulong kinikilala ang kabuuang asal niya bilang hindi karapat-dapat sa posisyon.
Unang inanunsyo ni Escudero na magsisimula ang paglilitis sa Hunyo 2, kasabay ng pagbubukas muli ng Senado. Ngunit noong Mayo 29, sinabi niyang ililipat ang presentasyon ng mga artikulo sa Hunyo 11 upang bigyang-priyoridad ang mga panukalang batas bago magsara ang ika-19 na Kongreso. Habang lumilipas ang bagong petsa nang walang aksyon, lalong tumitindi ang pagkadismaya ng civil society at mga akademiko. Giit ng mga kritiko, sinisira ng pagkaantala ang tungkulin ng Senado bilang patas na impeachment court sa ilalim ng Konstitusyon.
May babala ang ilan na kung hindi masimulan ang paglilitis bago ang Hunyo 30, maaaring maisantabi na ang kaso. Ayon sa iba, pinahihina ng pagbibigay-diin ni Escudero sa legislative procedure ang tiwala ng publiko sa pananagutan ng mga institusyon.
Lumalakas ang pressure. Mga batikang abogado, dating mahistrado, at mga institusyong akademiko—kabilang ang mga dekano ng mga law school ng Ateneo, Lasallian network, Adamson University, at University of Santo Tomas—ay nananawagang agad nang ituloy ng Senado ang paglilitis. Sa patuloy na paglakas ng panawagan, ang tanong: kailan kikilos ang Senado at ang pangulo nito?
