Noong Abril 26, 2025, isang trahedya ang yumanig sa Filipino community sa Vancouver, Canada, matapos salpukin ng isang SUV ang mga dumalo sa Lapu-Lapu Day Block Party. Ayon sa ulat ng Politico.com, labing-isa ang nasawi at higit sa 20 ang nasugatan sa insidenteng naganap bandang alas-8:14 ng gabi sa East 41st Avenue at Fraser Street, South Vancouver. Karamihan sa mga biktima ay mga Pilipino at Pilipino-Canadian na dumalo upang makiisa sa taunang selebrasyon ng kultura at kasaysayan.
Ang suspek na si Kai-Ji Adam Lo, 30-anyos mula Vancouver, ay agad na inaresto sa lugar ng insidente matapos siyang pigilan ng mga bystander. Ayon sa mga ulat ng New York Post at Vancouver Sun, kilala na si Lo sa mga lokal na awtoridad dahil sa kanyang posibleng sakit sa pag-iisip bago pa man ang insidente. Ipinabatid ng mga awtoridad na may mga naunang tala si Lo hinggil sa kanyang kalagayan sa mental health, ngunit hindi na nila ito lalong pinalawig sa publiko.
Sinampahan siya ng kasong murder noong Linggo, matapos ang karumaldumal na pagram ng sasakyan na ikinasawi ng 11 katao, na ang edad ay mula 5 hanggang 65 taong gulang. Bagaman hindi itinuturing na terorismo ang insidente, nagpapatuloy ang malalimang imbestigasyon upang matukoy ang kabuuang motibo ng suspek.
Ang Lapu-Lapu Day ay isang taunang pagdiriwang ng Filipino heritage sa British Columbia na opisyal na kinilala ng probinsya mula pa noong 2023. Ayon sa Politico.com, kahit na umuulan noong araw ng selebrasyon, libu-libong tao ang nagtipon upang makiisa sa kasiyahan ng pagkain, musika, sayawan, at pagtatanghal bilang pag-alala kay Datu Lapu-Lapu — ang bayaning unang lumaban sa pananakop ng mga Kastila.
Sa isang pahayag noong Abril 27, 2025, ipinahayag ni Pangulong Ferdinand Marcos Jr. ang kanyang matinding kalungkutan sa nangyaring insidente. Ayon sa Presidential Communications Office (PCO), sinabi ng Pangulo: “Lubos akong nabigla at nasaktan sa balita ng malagim na insidente sa Lapu-Lapu Day Block Party sa Vancouver, BC, Canada.” Iniutos rin niya sa mga diplomat at kawani ng Pilipinas sa Vancouver na magbigay ng agarang tulong sa mga biktima at makipag-ugnayan nang maayos sa mga Canadian authorities upang matiyak ang tamang suporta at koordinasyon.
Ang insidenteng ito ay nagdulot ng matinding pagdadalamhati hindi lamang sa Filipino community sa Vancouver — na tinatayang may populasyong higit sa 38,000 — kundi pati na rin sa buong Pilipinas. Mula sa ulat ng Global Nation (Inquirer.net), nagpahayag rin ng pakikiramay sina Canadian Prime Minister Mark Carney at British Columbia Premier David Eby, at nangakong magbibigay ng suporta sa mga pamilya ng mga biktima habang patuloy ang imbestigasyon.
